बालकांचा मोफत व सक्तीच्या शिक्षणाचा हक्क अधिनियम 2009 अन्वये (वंचित गटातील बालकांना व दुर्बल घटकातील बालकांना प्राथमिक शिक्षणासाठी प्रवेश देणेसाठी जागा राखून ठेवण्याची रीत) नियम 2012 प्रमाणे अल्पसंख्यांक शाळा वगळता, राज्यातील सर्व विना अनुदानित, कायम विना अनुदानित व स्वयंअर्थसहाय्यता तत्त्वावरील प्राथमिक शाळांना सन 2012-13 या शैक्षणिक वर्षापासून शाळेच्या पहिलीच्या वर्गाच्या एकूण विद्यार्थी संख्येपैकी 25 % पर्यंतच्या जागा नजीकच्या परिसरातील वंचित गटाच्या व दुर्बल घटकांतील बालकांच्या प्रवेशासाठी राखून ठेवणे व अशा बालकांना त्यांचे प्राथमिक शिक्षण पूर्ण होईपर्यंत मोफत व सक्तीचे शिक्षण पुरविणे बंधनकारक आहे. त्यानुसार सन 2017-18 या शैक्षणिक वर्षामधील 25% आरक्षण प्रवेश प्रक्रिया महाराष्ट्र शासनाच्या student.maharashtra.gov.in या लिंकवरील RTE Portal वर ऑनलाईन चालू झालेली आहे.
सदर प्रक्रियेअंतर्गत दि. 02/03/2017 अखेर कोल्हापूर जिल्ह्यामध्ये एकूण 1330 ऑनलाईन अर्ज प्राप्त झाले. सदर विद्यार्थ्यांच्या शाळा प्रवेशासाठी दि. 08/03/2017 ते दि. 25/03/2017 या कालावधीत विद्यार्थी प्रवेशाची पहिली फेरी राबविणेत आली. पहिल्या फेरीअखेर एकूण 524 विद्यार्थ्यांनी RTE च्या 25% कोट्यातून शाळेत प्रवेश घेतलेला आहे. त्यानंतर दि. 29/03/2017 ते दि. 13/04/2017 या कालावधीत विद्यार्थी प्रवेशाची दुसरी फेरी राबविणेत आली. दुस-या फेरीमध्ये एकूण 24 विद्यार्थ्यांनी RTE च्या 25% कोट्यातून शाळेत प्रवेश घेतलेला आहे. विद्यार्थी प्रवेशाची तिसरी फेरी दि. 15/04/2017 ते दि. 20/04/2017 अखेर राबविणेत आली. या फेरीमध्ये एकूण 11 विद्यार्थ्यांनी RTE च्या 25% कोट्यातून शाळेत प्रवेश घेतलेला आहे.
आजअखेर RTE च्या 25% विद्यार्थी प्रवेशाच्या 3 फे-यांमध्ये मिळून एकूण 559 विद्यार्थ्यांनी शाळेत प्रवेश घेतलेला आहे. सदर प्रवेश प्रक्रिया अद्याप चालू असून शासनाच्या सुचनांनुसार ऑनलाईन विद्यार्थी प्रवेशाच्या फे-या घेण्यात येत आहेत.